Fréttir

Flugskóli Reykjavíkur og FÍA undirrita kjarasamning.

Að mati okkar hjá FÍA er mikilvægt að hér á landi séu starfræktir flugskólar og að framtíðar flugmenn geti þar lært af reynslumiklum kennurum hvort sem er til einkaflugmanns eða atvinnuflugmannsréttinda.

Í byrjun þessa árs var undirritaður tímamótasamningur fyrir flugkennara hjá Geirfugli og Flugakademíu Íslands, en síðarnefndi skólinn hætti starfsemi í sumar.

Sá kjarasamningur er tvískiptur og tekur mið af þörfum ólíkra flugskóla en jafnframt er þess gætt að flugkennurum sé greitt fyrir alla vinnu, hvort sem hún er á jörðu niðri eða á flugi.

það hefur verið ánægjulegt að fylgjast með metnaðarfullum áformum þeirra sem standa að rekstri Flugskóla Reykjavíkur, en öllum flugkennurum sem áður störfuðu hjá Flugakademíu Íslands hefur nú verið boðið starf þar.

Í gær staðfestu fulltrúar FíA og Flugskóla Reykjavíkur kjarasamning og gildir hann til og með 31.12.2028

Með kjarasamningnum fjölgar félagsmönnum í FÍA og Flugskóli Reykjavikur verður leiðandi afl í menntun atvinnuflugmanna framtíðarinnar.

Við hjá FíA óskum flugkennurum og stjórnendum alls hins besta og erum stoltur samstarfsaðili Flugskóla Reykjavikur.

Skrifstofa FÍA er lokið fimmtudaginn 12. október vegna Reykjavík Flight Safety Symposium. Ef erindið þolir ekki bið má senda póst á fia@fia.is.

Hermann Sigurðsson tekur við starfi framkvæmdastjóra Félags íslenskra flugmanna (FÍA) af Láru Sif Christiansen sem hefur gegnt starfinu frá 2018. Hermann hóf störf 1. október og mun starfa við hlið Láru þar til hún lætur af störfum í lok desember.

Hermann starfaði sem framkvæmdastjóri Landssambands slökkviliðs- og sjúkraflutningamanna í 5 ár og bar hann ábyrgð á allri daglegri starfsemi þess og tengdum sjóðum, s.s. Styrktarsjóð, Starfsmenntunarsjóð, Orlofssjóð og Tryggingasjóð. Hann sat í samninganefndum og samstarfsnefndum og bar ábyrgð á viðburðum og útgáfumálum félagsins. Undanfarna mánuði hefur Hermann unnið sem verkefnastjóri og ráðgjafi í rekstri fyrirtækja.

Hermann starfaði sem framkvæmdastjóri Bandalags íslenskra skáta á árunum 2009 - 2017 og sat í stjórn fjögurra dótturfélaga og sá um að samhæfa aðgerðir á milli þeirra. Þar má nefna Skátamót ehf, Skátabúðin ehf, Grænir skátar ehf og var síðast formaður stjórnar Útilífsmiðstöðvar skáta á Úlfljótsvatni.

Hermann kláraði BS í viðskiptafræði frá Viðskiptaháskólanum á Bifröst 2004 og MCM nám í áfallastjórnun frá Háskólanum Bifröst 2023. Hermann er 42 ára Garðbæingur, er kvæntur Ósk Auðunsdóttur aðstoðarskólastjóra og á þrjú börn á aldrinum 6-11 ára. Hann hefur verið skáti frá barnsaldri og var virkur í björgunarsveitum um tíma. Hans helstu áhugamál er að ferðast innanlands og utan, stunda ýmis konar hreyfingu hvort það sé líkamsrækt, hjólreiðar eða badminton.

Stjórn FÍA þakkar Láru fyrir vel unnin störf í þágu félagsins, býður Hermann velkominn til starfa og hlakkar til samstarfsins.

Skrifstofa FÍA er opin alla virka daga frá kl. 9:00 - 13:00. Utan opnunartíma er hægt að senda póst á fia@fia.is

Öryggisnefnd FÍA harmar þá ákvörðun Innanríkisráðherra að fara gegn samkomulagi sem var undirritað í nóvember 2019 en þar stendur í 5.gr:

„Aðilar eru sammála um að tryggt verði rekstraröryggi á Reykjavíkurflugvelli á meðan undirbúningi og gerð nýs flugvallar stendur, þar með talið eðlilegt viðhald og endurnýjun mannvirkja í samræmi við ákvæði gildandi samgönguáætlunar Alþingis. Miðað verði við að Reykjavíkurflugvöllur geti áfram þjónað innanlandsflugi á fullnægjandi hátt þar til að nýr flugvöllur er tilbúinn til notkunar.“

Starfshópur Innviðaráðherra sem skipaður var vegna hugsanlegrar byggðar í Nýja Skerjafirði segir í sinni skýrslu að allar framkvæmdir í Nýja Skerjafirði muni hafa áhrif á rekstraröryggi flugvallarins.

Rétt er að benda á að til eru hjá ISAVIA gögn yfir vindmælingar á Reykjavíkurflugvelli, sem ná rúm 10 ár aftur í tímann. Þessi gögn geta meðal annars sýnt hvort og hvaða áhrif uppbygging í nálægð vallarins hefur haft á vindafar á vellinum á þessu tímabili. Mikilvægt er að rýna þessi gögn til hlítar til að meta áhrif byggðar á vindafar.

Sömuleiðis þarf að rannsaka áhrif viðbótarbyggðar á brautarskilyrði, svo sem bleytu og ísingarmyndun. Í lokaorðum skýrslunnar eru talin upp fleiri atriði sem ekki hafa verið rannsökuð sem geta haft áhrif á rekstraröryggi flugvallarins.

Umtalaðar mótvægisaðgerðir hafa ekki verið skilgreindar til hlítar eða útfærðar og óvíst að þær beri tilætlaðan árangur en þó er víst að rekstraröryggi vallarins mun skerðast.

Öryggisnefnd FÍA leggur til að fullnægjandi rannsóknir á fyrirliggjandi gögnum m.a. vindagögnum verði fullunnar og öllum framkvæmdum frestað þar til niðurstöður liggja fyrir.

F.h. Öryggisnefndar FÍA

Jón Hörður Jónsson - Formaður ÖFÍA

Aðalfundur FÍA verður haldinn 16. febrúar kl. 20:00 í Hlíðasmára 8.

Við viljum vekja athygli á breyttri staðsetningu, en ekki hægt var að halda fundinn á Grand Hótel eins og stóð til. Fundurinn er nú haldinn í höfuðstöðvum FÍA í Hlíðasmára 8.

Hefðbundin aðalfundardagskrá fer fram:

DAGSKRÁ

1. Stjórnarkjör
2. Skýrsla stjórnar
3. Reikningar félagsins lagðir fram til samþykktar
4. Lagabreytingar – engar lagabreytingartillögur
5. Kosning skoðunarmenn reikninga FÍA
6. Kosning fulltrúa í Starfsráð
7. Önnur mál

Sæti varaformanns og þriggja meðstjórnenda eru laus en í ljós hefur komið að sjálfkjörið verður í þau embætti. Í framboði til varaformanns er Guðmundur Már Þorvarðarson. Í framboði til stjórnar eru Jóhannes Jóhannesson (LHG), G. Birnir Ásgeirsson (AAI) og Haraldur Helgi Óskarsson (AAI).

Vonumst til að sjá ykkur flest í huggulegri stemningu í höfuðstöðvunum!