Nú í byrjun júní fengu 26 flugmenn Icelandair uppsagnarbréf sem tekur gildi 1. september n.k. Í dag var svo haldinn flugmannafundur hjá félaginu þar sem tilkynnt var um 28 uppsagnir í viðbót, 54 flugmenn alls fá því uppsagnarbréf að þessu sinni, sem eru fleiri en voru í uppsögn hjá félaginu veturinn 2009-2010. Stjórn FÍA lýsir undrun sinni á þessum uppsögnum, sérstaklega í ljósi þess að aukning er í áætlunarflugi hjá Icelandair næsta vetur og jafnframt liggja nú þegar fyrir leiguflugsverkefni fyrir veturinn sem lofi góðu. Ef þessar 54 uppsagnir taka gildi eru alls 90 flugmenn í uppsögn hjá félaginu.

Hjá FÍA er verið að fara yfir útreikninga á áhafnaþörf Icelandair um þessar mundir og ætti niðurstaða að liggja fyrir á næstu dögum.

Flugmenn og flugumferðarstjórar í Evrópu fagna afstöðu samgöngunefndar Evrópuþingsins varðandi drög að nýjum evrópskum lögum um rannsókn flugslysa. Nefndin telur afar nauðsynlegt að gæta að sjálfstæði rannsóknarnefndanna og aðgreina rannsókn þeirra frá mögulegri sakarannsókn – enda tilgangur þeirra fyrst og fremst að upplýsa og auka flugöryggi.  Þá tekur nefndin undir nauðsyn þess að tryggja lagavernd um viðkvæm rannsóknargögn sem kunna að koma fram.  Þetta mál er eitt meginefni ráðstefnu ECA sem haldin verður í Reykjavík í lok þessa mánaðar. 

ECA European Cockpit Association hefur sent frá sér meðfylgjandi fréttatilkynningu um málið.  Sjá hér.