Fréttir

Þann 6. desember næstkomandi mun Theodór Freyr veðurfræðingur vera með fræðslufund fyrir okkur flugmenn.
Fundurinn verður haldinn í Grjótnesi og hefst kl. 20.
Tilvalið að nota tækifærið og spyrja Theodór spurninga.

ÖFÍA

Nú fer hátt umræða um hvað er flugrekstraraðili og hvað ekki. Flugmálastjórn Íslands hefur nú loks sent frá sér yfirlýsingu að ekki sé rétt að kalla félög eins og Wow Air flugrekstraraðila enda eru þeir ekki með flugrekstrarleyfi og bera hvorki skyldur né kostnað sem því fylgir.
Skúli Mogensen kemur þá í fjölmiðla og heldur því blákalt fram að þeir séu íslenskt flugfélag og kórónar svo allt með fréttatilkynningu að Wow Air hafi tekið á móti nýrri flugvél, heldur er nú talið ólíklegt að farmiðasala, sem kaupir sína þjónstu af Lettneska flugfélaginu Avion Express, sé að taka á móti flugvélinni til að reka hana, það hlýtur að falla í hlut flugfélagsins en ekki farmiðasölunnar. Allt er þetta gert til þess eins að blekkja neytendur sem ekki átta sig endilega á því að ef eitthvað alvarlegt kemur uppá sem farmiðasalan er ekki tilbúin að bera ábyrgð á þá er eini rétturinn sem farþegar hafa gagnvart flugfélagi í Lettlandi, hvernig ætli gangi að sækja rétt sinn þangað austur?

Norsk yfirvöld hafa bannað gerviflugfélögum að nota orðið flugfélag en íslensk yfirvöld hafa ekki verið tilbúin að stíga það skref þar sem einungis orðið "Flugrekandi" kemur fram í íslenskri löggjöf, ekki orðið "flugfélag". Íslensk flugfélög sem fara eftir settum leikreglum og þurfa að uppfylla skilyrði eins og t.d. að hafa handbært fé til a.m.k. 3ja mánaða reksturs án innkomu, með þeim kostnaði sem því fylgir, standa því berskjölduð fyrir innkomu þessara gerviflugfélaga þangað til stjórnvöld jafna leikreglurnar. Leikreglur í þágu öryggis og viðurværis íslenskra starfsmanna!

Félag Íslenskra atvinnuflugmanna, FÍA, fordæmir þessi vinnubrögð og lýsir því jafnframt yfir að flugmenn fagna samkeppni á flugmarkaði, svo lengi sem slík samkeppni er á jafnréttisgrundvelli. Það er sorglegt þegar fyrirtæki reyna að bjóða betra verð með því að vera með starfsfólk sem verktaka og brjóta þannig niður réttindi starfsfólks.

Þau íslensku flugfélög sem eru með íslenskan kjarasamning við FÍA og íslenskt flugrekstrarleyfi og skila þar með sköttum og skyldum til íslensks samfélags eru:
• Air Atlanta
• Bláfugl
• Flugfélag Íslands
• Ernir
• Icelandair
• Landhelgisgæslan
• Mýflug
• Norlandair
• Þyrluþjónustan

auk flugskólanna:
• Flugskóli Akureyrar
• Flugskóli Íslands
• Geirfugl
• Keilir flugakademía

Flugöryggisstofnun Evrópu (EASA) mun innan tíðar gefa út lokatillögur sínar á nýjum flugvakt- og hvíldartímareglum (FTL). Hlutverk stofnunarinnar er að byggja tillögur sínar á vísinda- og læknisfræðilegum grunni með því að taka inn í myndina nýjustu vísinda- og læknarannsóknir í þessum efnum.

Norrænar flugáhafnir hafa alvarlegar áhyggjur af því að ferlið fram að þessu, þegar til stendur að gefa út lokatillögur stofnunarinnar, hafi ekki verið í samræmi við ofangreint hlutverk. EASA hefur, í tveimur aðskildum tilfellum, sótt vísindalegar og læknisfræðilegar upplýsingar til fremstu sérfræðinga Evrópu í flugþreytu og afkastagetu likamans. Þrátt fyrir það hefur EASA ákveðið að líta fram hjá niðurstöðum þessara aðila í nokkrum mikilvægum sviðum.

Norrænar flugáhafnir telja að öryggi farþega jafnt sem áhafna sé stefnt í hættu með innleiðingu vakttímareglna sem ganga í þvert á rannsóknir á getu mannsins. Þrátt fyrir að reglugerðir utan Evrópu séu að þróast í öryggisátt, ákveður EASA að þróa reglurnar í átt meira álags og þreytu.

Vandamál tengd þreytu er vel þekkt og skráð sem veruleg hætta í flugheiminum.
Í ljósi þess á ekki að leita málamiðlunar í tenglum við svo mikilvægar reglugerðir. Að meðaltali hefur þreyta mikil áhrif í um 20% af alvarlegum flugslysum. Flugfarþegar ættu að vita af þeirri langtíma hættu sem stafar af gölluðum reglum sem eiga að verja farþega og áhafnir fyrir þreyttum flugáhöfnum.

Norrænar flugáhafnir krefjast því að Norræn yfirvöld nýti nú stöðu sína og vinni að því að framtíðar flugvakt- og hvíldartímareglur verði byggðar á vísindalegum- og læknisfræðilegum grunni.

Svensk Pilotförening Gunnar Mandahl

Unionen                                                     Niklas Hjert

Norsk Flygerforbund                                                   Christian Langvatn

Parat                                                                         Vegard Einan

Danish Airline Pilots’ Association, DALPA                         Lars Bjørking

Cabin Union Denmark, CUD                                         Henrik Parelius

Finnish Pilots’ Association                                             Hannu Korhonen

Finnish Cabin Crew Union                                             Thelma Åkers

Icelandic ALPA                                                             Hafsteinn Pálsson

Icelandic Cabin Crew Union Sigrún Jónsdóttir

Estonian ALPA Rauno Menning

Estonian Cabin Crew Union Veiko Saga

Fyrir hönd 15 300 atvinnuflugmanna og flugáhafna sem fljúga með þig yfir Svíþjóð, Noreg, Danmörku, Finnland, Ísland og Eistland.

Fimmtudaginn 21. júní s.l. var skrifað undir nýjan kjarasamning við flugfélagið Bláfugl. Samningurinn er nú í kynningu á meðal félagsmanna og verður í kjölfarið settur í kosningu. Niðurstaða ætti að liggja fyrir í byrjun júlí.

Nú framundan er flugdagur á Akureyrarflugvelli, en þessi árlegi viðburður verður nú laugardaginn 23. júní og hefst kl. 13:00 þann dag. Kynnir er Ómar Ragnarsson. Nánari upplýsingar fást með því að smella á myndina hér í fréttinni.

Kynnir er Ómar Ragnarsson og aðgangseyrir er kr. 1000,-

Þess má geta að þessi flugdagur hefur verið mjög vinsæll undanfarin ár og hafa margir sem búsettir eru annars staðar en í Eyjafirði notað tækifærið og flogið á sínum einkaflugvélum norður yfir heiðar til að njóta "góða veðursins" sem alltaf er á norðurlandi. Þá er upplagt að nota tækifærið og skoða hið glæsilega Flugsafn Íslands og allar þær dýrðir sem það hefur uppá að bjóða.

Flugdagurinn hefur að jafnaði verið haldinn í námunda við Jónsmessuna og er árið í ár engin undantekning þar á.

Ráðstefna ECA hefur nú samþykkt að greiða út samúðarsjóð sinn, rúmlega 15 þúsund Evrur, til styrktarsjóðs Paul Ridgard. Paul Ridgard var flugmaður hjá Ryanair sem féll frá með sorglegum hætti og lét eftir sig son og eiginkonu. Rayanair flugmenn eru réttindalausir menn eins og margir flugmenn hjá "verktakaflugfélögum" (eins og flugmenn einhverra lággjaldafélaga sem fljúga til Íslands) og hefur fjölskyldan því í fá hús að venda eftir fráfall Pauls.

Þetta undirstrikar þörfina á að lagfæra umhverfið í kringum þessa verktakamennsku sem hefur tröllriðið Evrópu undanfarin áratug. Fyrir utan þá staðreynd að þessi hópur er réttindalaus þá er samfélagið að verða af umtalsverðum upphæðum hvað varðar skatta og önnur gjöld.

Það er þó ánægjulegt að ECA geti orðið að liði í þessu tilfelli en staðreyndin er sú að þessi samúðarsjóður er nú tæmdur og sambærileg áföll í framtíðinni verða því ekki bætt úr þessum sjóði.

Þótt formleg dagskrá árfundarins hefjist ekki fyrr en á föstudegi, er fjölsóttur fundur í dag (3.maí) sem haldin er á vegum flugmannafélaga Skyteam, Star Alliance og One world flugfélaganna, með fullþingi IFALPA. Þar er eru fengnir fulltrúar frá flugmönnum og flugfélögunum til að ræða saman í „panel“ um ýmis sameiginleg hagsmunamál eins og samskipti flugmannafélaga og stjórnenda flugfélaga, útþenslu flugfélaga úr „flóanum“ (Emirates, Qatar og Ethiad) og einnig reynt að rýna í hvert rekstrarform flugfélaganna er að þróast. Eru t.d. gömlu þjóðarflugfélögin eða „flag carriers“ að deyja út?

Auk ársfundar alþjóðasamtakanna, halda samtök hvers heimshluta sinn fund á laugardag til að ræða sín sérmál. Þannig sitja FÍA fulltrúar ráðstefnu ECA á laugardag, þar sem m.a. verður fjallað um nýja FTL reglugerð EASA, kynnt skýrsla síðasta starfsárs, rætt um málefni „Trans national“ flugfélaga eins og Ryan air o.fl. og fleira sem varðar regluverk í Evrópu og flugmenn.

Á sérstökum fundi um öryggismál sem er hluti af ráðstefnunni verður fjallað sérstaklega um FRMS (fatigue reduction management systems).

FÍA sendir að þessu sinni fjóra fulltrúa á árfundinn í París. Formann FÍA og varaformann ásamt framkvæmdastjóra FÍA og IFALPA/ECA fulltrúa félagsins.

Þann 1. mars s.l. var undirritaður nýr kjarasamningur við flugfélagið Ernir. Samningurinn verður settur í atkvæðagreiðslu sem lýkur laugardaginn 10. mars n.k.

Kjarasamningurinn er í meginatriðum með svipuðu sniði og aðrir samningar FÍA fyrir sama tímabil en hann gildir til 31. mars 2014.