Fréttir
Útkallsdagur - Flugmenn kalla eftir bættu regluverki Evrópusambandsins
(ECA ? ACTION DAY 5. október)
Evrópusamband flugmanna (ECA – European Cockpit Association) mun standa fyrir mótmælum 5. október n.k.. Mótmælin beinast að veiku regluverki Evrópusambandsins um flug-, vakt- og hvíldartíma flugáhafna, sem samtökin telja brýnt að laga – í þágu flugöryggis.
Til að tryggja reglur um samræmt flugöryggi í Evrópu þarf Evrópusambandið að sýna kjark og taka mark á vísindalegum niðurstöðum.
Fyrir um einu ári birti Evrópusambandið ítarlega skýrslu vísinda- og læknanefndar helstu stofnana sambandsins. Niðurstaða skýrslunnar er í megindráttum að núverandi reglur um hámarksvaktir og fleira varðandi vinnutíma eru ekki í lagi.
Þrátt fyrir þessa vitneskju hefur Evrópusambandið ekki enn tekið tillit til niðurstöðu skýrslunnar.
Flugmenn efna af þessu tilefni til útkalls mánudaginn 5. október til að mótmæla og knýja á um breytingar. Stærstu mótmælin fara fram þegar Evrópuþingið kemur saman í Brussel en einnig á flugvöllum vítt og breitt um álfuna. Íslenskir atvinnuflugmenn sýna samstöðu með evrópskum félögum sínum og verða á Keflavíkurflugvelli og Reykjavíkurflugvelli þennan dag til að kynna málið.
Markmiðið er aðeins eitt – flugöryggi fyrir alla.
Nokkur atriði til umhugsunar úr gildandi reglugerð:
? Tveir flugmenn mega vera á vakt í 14 klst að degi til – þ.e. við stjórnvölinn við stýrin á flugvél í allt að 13 klst.
Vísindanefndin telur þetta of mikið og beri að minnka.
? Næturvakt flugmanna (vakt hefst milli kl. 22 og 04:59) má vera 11:45.
Vísindanefnd telur að þetta eigi að vera að hámarki 10 klst.
? Samanlagður vakttími í hverri viku má vera 60 klst. Þetta þýðir 180 klst á 21 degi. Vísindanefndin telur þetta of mikið. Mælt er með takmörkun sem nemur 100 klst vakttíma á hverjum 14 dögum.
? Bakvaktir (þar sem flugmaður er reiðubúinn til útkalls með litlum fyrirvara) takmarka ekkert lengd flugvaktar. Þ.e. flugmaður sem búinn er með t.d. 12 klst bakvakt getur í lok hennar farið beint á hámarksvakt samkvæmt reglugerð (max 14 klst).
Vísindanefndin telur eðlilegt að bakvaktin takmarki hámarksvaktina ef til útkalls kemur.
Nánari upplýsingar fást á, www.dead-tired.eu
Einnig hjá Kjartani Jónssyni framkvæmdastjóra FÍA, 824-8070 eða Jóhannesi Bjarna Guðmundssyni formanni FÍA 899-3804.
