Flugakademía Keilis heldur í haust ráðstefnu í samvinnu við ýmsa aðila þar sem fjalla á um eldgosið í Eyjafjallajökli og áhrif öskufalls á flugrekstur. Ráðstefnan er eintakt tækifæri fyrir bæði Evrópska og Bandaríska aðila til að hittast og ræða hvað hefði mátt fara betur og bera saman bækur sínar.

Forráðamönnum í flugrekstri, vísindamönnum og fulltrúum opinberra aðila frá Bandaríkjunum, Evrópu, Kína og Rússlandi hefur verið boðið á ráðstefnuna sem verður haldin dagana 15. og 16. september á gamla varnarsvæðinu við Keflavíkurflugvöll sem nú heitir Ásbrú.

Dagana 29. og 30. júní er ráðstefna á vegum FÍA, fyrir Evrópusamband flugmannafélaga, ECA (European Cockpit Association). Ráðstefnan er haldin á Hilton Nordica hótel og er aðalmálefni ráðstefnunnar lagafrumvarp um rannsóknir flugslysa ásamt umræðum um flug í tengslum við eldgos. Um 80 manns eru nú hér á landi í tengslum við ráðstefnuna, ýmist forsvarsmenn flugmannafélaga víðsvegar að úr Evrópu sem og starfsfólk af skrifstofu ECA í Brussel.

Að lokinni ráðstefnunni á miðvikudag er formanni ECA, Martin Chalk, og formanni IFALPA (alþjóðlegu flugmannasamtökunum), Carlos Limón, sem einnig er staddur hér á landi, boðið í móttöku á Bessastöðum hjá Forseta Íslands.

Nú í byrjun júní fengu 26 flugmenn Icelandair uppsagnarbréf sem tekur gildi 1. september n.k. Í dag var svo haldinn flugmannafundur hjá félaginu þar sem tilkynnt var um 28 uppsagnir í viðbót, 54 flugmenn alls fá því uppsagnarbréf að þessu sinni, sem eru fleiri en voru í uppsögn hjá félaginu veturinn 2009-2010. Stjórn FÍA lýsir undrun sinni á þessum uppsögnum, sérstaklega í ljósi þess að aukning er í áætlunarflugi hjá Icelandair næsta vetur og jafnframt liggja nú þegar fyrir leiguflugsverkefni fyrir veturinn sem lofi góðu. Ef þessar 54 uppsagnir taka gildi eru alls 90 flugmenn í uppsögn hjá félaginu.

Hjá FÍA er verið að fara yfir útreikninga á áhafnaþörf Icelandair um þessar mundir og ætti niðurstaða að liggja fyrir á næstu dögum.